سنين وأنا بستناه ولما رجع

جوزي مسافر بقاله 10 سنين من تاني أسبوع جواز سافر وسابني وكنت عايشة في بيت عيلة فلاحين
كنت أقوم من الفجر أشتغل وأخدم ومارجعش شقتي غير على النوم
استحملت كتير وخدمت أهله بكل رضا وربنا كرمني بولد وبنت
جوزي ماكنش بينزل غير أسبوع واحد في السنة وكان بيبعتلي الفلوس علشان أبني بيتنا
وبالفعل بعت دهبي وميراثي وحطيت كل القرشين اللي معايا معاه
لحد ما ربنا وفقنا وعملنا بيت كبير في قرطين 3 أدوار وكنت بقول خلاص ده تعبنا وهيبقى لينا ولولادنا
لكن في يوم لاحظت إن حماتي بتكلمه بطريقة غريبة كلها تلميحات وألغاز

ولقيت كل العيلة بتتعامل كده علشان ما أفهمش
لحد ما اكتشفت الحقيقة اللي كسرتني
جوزي متجوز واحدة مصرية مغتربة معاه هناك
الكلمة دي وقفت حياتي
أنا اللي كنت فاكرة نفسي صبورة قوية اتحولت في لحظة لطفلة ضايعة في زحمة الدنيا
فضلت قاعدة في مكاني مش قادرة أتنفس
قلبي

بيخبط في صدري كأنه بيحاول يخرج من الوجع
كنت ببص حوالي ومش شايفة حاجة
بس دموعي نازلة ودماغي بتعيد كل لحظة بيني وبينه كأنها فيلم بيتعاد بالعذاب
أنا اللي كنت كل يوم بدعيله وهو في الغربة
يا رب احفظه من العين يا رب رجعه سالم يا رب بارك له في رزقه
طلع هو هناك بيبني حياة تانية!
مش بس بيت لا حياة كاملة ضحك وأكل وسهر وكلام

طب وأنا
أنا كنت هنا بربي أولاده
بلم هدوم أهله من على الحبال
وبمسح تراب البيت اللي مش بيخلص
وبحوش كل مليم
وبضحك وأنا موجوعة علشان الناس ما تشمتش فيا
كنت بقول ما هو الغربة صعبة أكيد هيرجعلي يوم ونعوض اللي فات
بس الحقيقة
هو نسيني
نسي وشي نسي صوتي نسي ريحة بيته نسي حتى أسماء ولاده!
في أول يوم عرفت فيه الخبر قعدت طول الليل على الأرض
ماقدرتش أنام ولا أكل ولا حتى أعيط زي الناس
كل اللي كنت بحسه هو فراغ
كأني اتخلقت من جديد بس بدون قلب
وتاني يوم الصبح
حماتي جت ووشها كله نظرات شماتة مقنعة بالشفقة
قالتلي وهي بتسند إيدها على صدرها
الراجل في الغربة بيحتاج اللي تريحه يا بنتي إنتي كنتي عايزة يعيش ازاي لوحده
رديت وأنا مش قادرة أسيـــ,طر على نفسي
يعني علشان محتاج يهد اللي بنيته يهدني أنا

قالتلي وهي تضحك ضحكة صغيرة
إنتي كنتي سايباها له سهلة كل حاجة عندك شغل وعيال وبيت الراجل عايز كلمة حلوة
مشيت من قدامها وأنا بترعش
مش من البرد من القهر
كل كلمة قالتها كانت خنجر
ماحدش شايف وجعي
ولا حد حاسس إني ضحيت بكل حاجة عشانه
فضلت أيام على الحال ده
وبعدين قلت لنفسي مش هعيش كده لازم أواجهه
كلمته
رد عليا بعد تلات رنات صوته بارد جدا
قلتله هي مين قولي بصراحة
ضحك وقال
واحدة محترمة مصرية زينا وأنا اتجوزتها بالحلال
قلتله وأنا بحاول أستوعب
يعني خلاص حياتك هناك
قال
ما تعمليش فيها دراما كل واحد ليه نصيبه
نصيبه
ده نصيبي أنا اللي اتســ,رق!
سكرت الموبايل
وبكيت بكيت لدرجة إن نفسي اتقطع

ولادي كانوا نايمين وأنا بخــ,نق صوتي عشان ما يصحوش عليا
حسيت إن الدنيا كلها ضدي
حتى ربنا حسيته بعيد عني
بس بعد شوية
سمعت ابني بيكلم في نومه وبيقول
ماما ماتسيبنيش
الكلمة دي كانت كأنها من ربنا
قومت وغسلت وشي ومسحت دموعي وقلت لنفسي
أنا مش لوحدي أنا عندي أولادي وأنا لسه قادرة أقف
بعد أيام قررت أتصرف
روحت على المحامي اللي كان بيخلص له ورقه في الغربة
قلتله عايزة أضمن حقي
قال حقك في إيه
قلتله في بيت عمري

وريته التوكيل اللي ماضيهولي وابتسم وقال
انتي ست عاقلة هنعمل الصح
نقلت كل حاجة باسمي
مش علشان أطمع
لكن علشان لو يوم رجع وباع البيت ولا كتبه لحد
يبقى تعب عمري ما راحش هدر
عدى شهر وجالي خبر إنه جاي مصر
حماتي كانت فرحانة جدا
وقالتلي
ابني راجع ومعاه مفاجأة
ضحكت ساعتها وقالت شكلها عروسته الجديدة
ضحكت بس المرادي مش من سخريتها
ضحكت لأني كنت خلاص فضيت من جوا
في اليوم اللي رجع فيه
كنت عاملة الأكل اللي بيحبه
مش علشان هو
علشان نفسي ما تقولش بعدين قصرتي
لكن لما دخل
دخل بإيديها في إيده!
هي اللي اتجوزها هناك