كلام مين جوزي ولا اخويا

انا واقىعه في النص مابين جوزي واخويا ومش عارفه اصدق مين فيهم ولا مين فيهم خايف عليه وعلى مصلحتي معلش يا استاذه غاده انشري مشىكلتي واقريها انتي ومتابعينك للنهايه على صفحتك ازواج لكن سعداء ، انا ورثت من ابويا حته ارض مساحتها حلوة اخدتها بالعافيه لاننا صعايده فالعرف ان البنات ما تورثش بس

جوزي فضل ورا اخواتي لغايه ما أخدت الارض بس اخويا الكبير اقنعني اجرها ملعب وفعلا اجرتها وكنت بأستفيد من تأجرها واصرف بيه على ابني الوحيد اصلي انا زوجه تانيه وجوزي مخلف خمس عيال من الاولى ومني انا عيل واحد وقالي انا اللي مش حقدر اجيبه جيبيه انتي فعشت على كده ، لغايه ما لاقيت بنت عمتي بتقولي خلي بالك من اخوكي اصلي لاقيته واخد حته من ارضك وعملها جراج وعشان انا مش بروح الارض والايجار بيجيلي على البيت فقالتلي خلي بالك قولتلها ما احنا كاتبين عقود بكده

قالتلي وايه يعني اهو كل شويه ياخد حته وانتي مش حاسه وعلى فين بقى ما تثبتي انها ارضك طبعا بنت عمتى بيتها قصاد حته الارض بتاعتي فشايفه كل حاجه روحت جري حكيت لجوزي قالي بقولك ايه شيل ده من ده يرتاح ده عند ده انتي تبيعي الارض وتاخدي فلوسها وتريحي دماغك من وجع القلب ده روحت عند اخويا اقوله عايزة ابيع الارض قالي ليه خىسارة دي الاراضي كل يوم بتعلى خليها لابنك لما يكبر يستفيد بيها وبعدين هو مين اللي شار عليكي بيبعها قولتله جوزي قالي ااااه انا كده فهمت اصلك عبيطه مش فاهمه اللي جوزك بيعمله من وراكي بس انا اللي عارف اصل جوزك ناوي يجهز بنته الكبيره من فلوسك يا خايبه امال انتي فاكره ايه ده عايزك تبيعي وعشان انتي

بتحبيه مش حتبخلي عليه بأي مبلغ ياخدوا منك على سبيل السلف وفلوسك وفلوس ابنك تضيع بلاش تبيعيها انا الصراحه مش عارفه اعمل ايه ولا اسمع كلام مين فيهم اخويا اللي فعلا روحت الارض ولاقيت عربيتين واقفين جراج على ارضي ولا اسمع كلام جوزي وابيعها لانه بيقولي في الرايحه والجايه لولا انا كنت وراهم مكنش حد عطاكي ورثك الفضل ليه انا ولازم تسمعي كلامي ارجوكم اعتبروني اختكم يا متابعين صفحه ازواج لكن سعداء وقولولي اعمل ايه شكرا ليكم واسفه على الاطاله

لا حول ولا قوه الا بالله العلي العظيم٠ العظيم٠